Tak appina niður
      Til iPhone - iPad - Android
      Fjórða Mósebók, kapittul 4
      Størv Levitanna
      v1Harrin talaði við Móses og Áron og segði:v2«Tak millum Levi sona manntal av sonum Kehats eftir kyntáttum og ættum teirra,v3øllum vígførum frá tríati ára aldri og haðan eldri til fimmti ára aldurs, øllum, sum í einumhvørjum staði gera tænastu við samfundartjaldið.v4Við hetta skulu synir Kehats tæna í samfundartjaldinum – hitt háheilaga.v5Tá ið herurin flytur úr stað, skulu Áron og synir hans ganga inn og taka niður hitt innara fortjaldið og hylja vitnisburðarørkina við tí;v6og oman yvir tað skulu teir leggja áklæði av sækúgvaskinni og aftur oman yvir tað breiða klæði, sum alt er av bláum purpuri, og síðan seta stengurnar í.v7Á sýnisbreyðaborðið skulu teir breiða klæði av bláum purpuri og seta á køskir og kannur, offurbollar og droypioffurskálir og breyðini, sum altíð skulu vera á tí.v8Oman yvir alt hetta skulu teir breiða skarlaksklæði og aftur oman yvir tað leggja áklæði av sækúgvaskinni og seta síðan stengurnar í.v9Síðan skulu teir taka av bláum purpuri og leggja yvir ljósastakan og lampur hans, ljósasaksar og skarpannur og øll oljuílát, sum nýtt verða við hann;v10og teir skulu sveipa hann og øll amboð hans í áklæði av sækúgvaskinni og leggja tað á børur;v11yvir gullaltarið skulu teir somuleiðis breiða klæði av bláum purpuri og aftur oman yvir tað leggja áklæði av sækúgvaskinni og síðan seta stengurnar í;v12og teir skulu taka øll amboð, sum nýtt verða til tænastuna í halgidóminum, sveipa tey í klæði av bláum purpuri og oman yvir tað leggja áklæði av sækúgvaskinni og síðan leggja tað á børurnar.v13Framvegis skulu teir sópa øskuna av altarinum og breiða yvir tað klæði av reyðum purpuriv14og á tað leggja øll amboð tess, ið nýtt verða á tí við tænastuna, eldpannurnar, soðkrókarnar, eldspakarnar og offurbollarnar, øll amboð altarsins, og leggja yvir tað áklæði av sækúgvaskinni og síðan seta stengurnar í.v15Og tá ið Áron og synir hans hava lokið at breiða yvir halgidómin og øll amboð halgidómsins, og herurin flytur úr stað, tá skulu synir Kehats ganga fram og taka undir at bera; men teir mega ikki nema við halgidómin, til tess at teir skulu ikki týna lívið. Hetta er tað, sum synir Kehats hava at bera av samfundartjaldinum.v16Eleazar, sonur Árons prests, skal hava umsjón yvir oljuni til ljósastakan, hinum vælangandi roykilsinum, hinum dagliga grónofrinum, salvingaroljuni og umsjón yvir øllum tjaldtemplinum og yvir øllum lutum og øllum amboðum, sum í halgidóminum eru.»
      v17Og Harrin talaði við Móses og Áron og segði:v18«Latið ikki kyntættir Kehatsættar verða avoyddar millum Levitanna.v19Tí skulu tit gera hetta fyri teir, til tess at teir mega verða á lívi og ikki doyggja, tá ið teir nærkast tí háheilaga. Áron og synir hansara skulu koma og leggja teimum lag á, hvat teir eiga at gera, og hvussu teir skulu bera,v20til tess at teir ikki mega bera eyga við tað minsta sindur av halgidóminum, tí at annars týna teir lívið.»
      v21Og Harrin talaði við Móses og segði:v22«Tak eisini manntal av sonum Gersjons eftir kyntáttum og ættum teirra; frá tríati ára gomlum og haðan eldri til fimmti ára aldurs,v23allar vígførar skalt tú kanna og skipa teimum tænastu við samfundartjaldið.v24Hetta er tænasta Gersjonita, tað, sum teir eiga at starva við og bera:v25Teir skulu bera tjalddúkar tjaldtempulsins, samfundartjaldið og tak tess og takið av sækúgvaskinnum, sum er oman á tí, og fortjaldið fyri durum samfundartjaldsins;v26og framvegis forgarðstjøldini og fortjaldið fyri inngongd forgarðsins, ið liggur kring um tjaldtemplið og altarið, tjaldreip og øll amboð, sum har verða nýtt; alt, sum er at gera við hetta, skulu teir gera.v27Eftir boði Árons og sona hans skulu Gersjonitarnir gera alla tænastu sína bæði viðvíkjandi tí, sum teir eiga at bera, og tí, sum teir eiga at starva við. Tit skulu fyriskipa teimum gjølla alt, sum teir eiga at bera.v28Hetta er tænastustarv ættargreinar Gersjonita við samfundartjaldið, og Ítámar, sonur Árons prests, skal hava umsjón við tænastu teirra.
      v29Synir Merari skalt tú kanna eftir kyntáttum og ættum teirra,v30allar vígførar frá tríati ára aldri og haðan eldri til fimmti ára aldurs skalt tú kanna og skipa teimum tænastu við samfundartjaldið.v31Starv og øll tænasta teirra við samfundartjaldið skal vera at bera tiljuborð tjaldtempulsins, lokur tess, stólpar og undirstabbar teirra,v32og somuleiðis stólparnar kring forgarðin og undirstabbar teirra, tjaldhælir og reip og øll tey amboð, sum verða nýtt í starvinum við alt hetta. Tit skulu fyriskipa teimum gjølla alt, sum teir eiga at bera.v33Hetta er tað, sum ættargrein Merarita eigur at gera, øll tænasta teirra við samfundartjaldið undir umsjón Ítámars, sonar Árons prests.»
      v34Móses og Áron og høvdingar savnaðarins kannaðu nú Kehatitarnar eftir kyntáttum og ættum teirra,v35allar vígførar frá tríati ára aldri til fimmti ára aldurs og skipaðu teimum tænastu við samfundartjaldið.v36Og teir, ið vóru kannaðir av teimum, komu upp í tvey túsund, sjey hundrað og fimmti.v37Hesir vóru teir kannaðu av kyntáttum Kehats, allir, ið starvaðu við samfundartjaldið, og sum Móses og Áron kannaðu eftir boði Harrans við Mósesi.
      v38Og teir, ið kannaðir vóru av Gersjonitum eftir kyntáttum og ættum teirra,v39allir vígførir frá tríati ára aldri og haðan eldri til fimmti ára aldurs, ið fingu tænastu við samfundartjaldið,v40teir, ið kannaðir vóru av teimum eftir kyntáttum og ættum teirra, komu upp í tvey túsund og seks hundrað og tríati.v41Hesir vóru teir kannaðu av ættargreinum Gersjonita, allir, sum starvaðu við samfundartjaldið, og sum Móses og Áron kannaðu eftir boði Harrans.
      v42Teir, ið kannaðir vóru av ættargreinum Merarita eftir kyntáttum og ættum teirra,v43allir vígførir frá tríati ára aldri og haðan eldri til fimmti ára aldurs, ið tænastu fingu við samfundartjaldið,v44teir, ið kannaðir vóru av teimum eftir kyntáttum teirra, komu upp í trý túsund og tvey hundrað.v45Hesir vóru teir kannaðu av kyntáttum Meraritanna, sum Móses og Áron kannaðu eftir boði Harrans við Mósesi.
      v46Allir, ið kannaðir vóru, som Móses og Áron og høvdingar Ísraels kannaðu av Levitunum eftir kyntáttum og ættum teirra,v47allir vígførir frá tríati ára aldri og haðan eldri til fimmti ára aldurs, allir, ið fingu arbeiði og burðartænastu við samfundartjaldið,v48teir, ið kannaðir vóru av teimum, komu upp í átta túsund og fimm hundrað og áttati.v49Eftir boði Harrans við Mósesi varð hvørjum einstøkum teirra fyriskipað, hvat teir skuldu starva við, og hvat teir áttu at bera; teimum varð fyriskipað tað, sum Harrin hevði boðið Mósesi.